3. MECÁNICA DO CONCURSO
3.1. Entrega de materiais e comunicacións cos CENTROS
Todos os centros inscritos recibirán unha comunicación por mensaxe electrónica coa confirmación da súa inscrición no concurso.
Os CENTROS recibirán un paquete que incluirá:
- Unha carta informativa onde se detallarán as instrucións para o correcto desenvolvemento da campaña, xunto co listado de materiais que se lles envía.
- Un contedor para depositar as PILAS durante o transcurso do concurso.
- Unha funda coa imaxe da campaña para colocar sobre o contedor onde se depositarán as PILAS no centro educativo.
- Un lote de caixas para facilitar a recollida de pilas nos fogares do alumnado do centro.
- Carteis coa imaxe da campaña Pilabot para colocar en distintos lugares do centro.
No momento da inscrición, os centros facilitarán no campo “enderezo do centro” o que será o único punto de entrega de materiais, así como de recollida e pesada dos contedores.
Ademais, os CENTROS disporán tamén de recursos dixitais na web www.pilabot.gal, sobre os que se apoiarán para ofrecer aos alumnos e alumnas información sobre a recollida selectiva e reciclaxe de PILAS.
3.2. Entrega de contedores
Unha vez rematado o prazo de inscrición, os CENTROS aos que se lles confirmara a súa participación recibirán unha mensaxe electrónica que comunicará a data estimada de entrega dos contedores onde se recollerán as pilas (en función do número de alumnos por centro, os centros poderán recibir inicialmente 1 ou 2 contedores). Posteriormente, cunha antelación mínima de dous días lectivos confirmarase a data efectiva da entrega dos contedores (cunha marxe de máis/menos 2 días lectivos).
Para facilitar as operacións de pesada e recollida dos contedores, estes deberán situarse a cuberto e en plantas baixas con fácil acceso (entrada da escola, a pé de rúa…), non en pisos superiores, posto que un contedor cheo ten un peso aproximado de 90 kg.
Calquera incidencia ou dúbida relativa á entrega dos contedores será atendida no enderezo electrónico pilabot@ofipilas.es e no teléfono 900 103 138.
3.3. Recollida de residuos nos centros
O obxectivo do concurso é recoller no contedor a máxima cantidade de residuos de pilas e acumuladores portátiles procedentes das familias dos alumnos e alumnas e do persoal do propio centro durante as SEIS SEMANAS LECTIVAS que dura la campaña en cada centro.
A recollida realizarase por un xestor que conta coa habilitación administrativa esixida para a recollida e o transporte destes residuos. A recollida final de residuos levarase a cabo transcorridas as SEIS SEMANAS LECTIVAS desde a entrega do contedor no centro escolar. Con todo, poderanse realizar recollidas intermedias durante o período de participación, no caso de que fose necesario por cuestións loxísticas.
Os CENTROS recibirán unha mensaxe electrónica que comunicará a data estimada de recollida dos contedores onde se recollerán as pilas. Posteriormente, cunha antelación mínima de dous días lectivos confirmarase a data efectiva da recollida dos contedores (cunha marxe de máis/menos 2 días lectivos). Os CENTROS comprométense a facilitar a recollida de residuos de pilas na data indicada no concurso. No caso contrario, os ORGANIZADORES resérvanse o dereito a deixar fóra do concurso ao centro. Calquera problema respecto á data de recollida deberá ser comunicado o antes posible no enderezo pilabot@ofipilas.es e no teléfono 900 103 138.
Durante a recollida, pesaranse os quilos acumulados in situ, anotándoos nun albará no mesmo momento, do cal se fará entrega á escola unha copia co resultado da pesada. A pesada terá en conta o peso do contedor e os residuos de pilas e acumuladores que hai no interior deste. Os quilos de residuos de pilas acumulados obteranse de restar a tara do contedor ao resultado da pesada. Non se recollerán e non formarán parte desta campaña, pilas e acumuladores que non estean no contedor (por exemplo, en bolsas ou caixas). Se o contedor facilitado énchese de pilas antes do período de seis semanas lectivas, poderanse solicitar contedores adicionais para seguir acumulando residuos de pilas.
Calquera incidencia ou dúbida relativa á acumulación de residuos de pilas durante o concurso e á recollida dos contedores será atendida no enderezo electrónico pilabot@ofipilas.es e no teléfono 900 103 138.
3.4. Contedores adicionais
Para solicitar contedores adicionais, os centros educativos poderán dirixirse ao enderezo electrónico pilabot@ofipilas.es e ao teléfono 900 103 138, indicando no asunto da mensaxe “Contedor adicional Pilabot para *nome do CENTRO*”.
Os contedores adicionais solicitaranse cando o centro comprobe que se está enchendo o contedor inicial antes do prazo das 6 semanas.
Por cuestións loxísticas, os contedores adicionais solicitados durante os últimos días de participación no concurso poderán entregarse no mesmo momento da recollida final, computando todos os residuos que conteñan na pesada total de residuos recollidos nese centro.
3.5. Resolución do concurso
Unha vez finalizado o prazo do concurso, daranse a coñecer os dous centros que máis pilas recollesen en total e os dous centros con maior ratio de peso de PILAS por alumno, tal e como se detalla no apartado 4 das presentes bases legais.
3.6. Actividade paralela ao Concurso Pilabot
Ademais do concurso de recollida de pilas, levaranse a cabo talleres didácticos.
Os ORGANIZADORES desta campaña poñen a disposición dos centros participantes no Concurso Pilabot a posibilidade de solicitar un taller didáctico sobre a reciclaxe das pilas.
- Darase un taller por centro nun máximo de 50 centros educativos.
- Trátase de talleres didácticos de 45 minutos de duración (unha clase) dirixida a un máximo de 50 alumnos de idades similares, nas que se informará aos alumnos sobre a campaña, unha posta en valor da importancia das pilas e acumuladores na nosa vida diaria, á vez que se profundará na sensibilización sobre a necesidade da separación selectiva.
- Os centros interesados deberán indicalo no formulario de inscrición do Concurso Pilabot dispoñible na web www.pilabot.gal. De contar con máis de 50 centros interesados, a adxudicación determinarase a través dun sorteo que realizarán os ORGANIZADORES, tendo prioridade en todo caso aqueles centros educativos que non recibisen charlas educativas en edicións anteriores do Concurso Pilabot.
- Os CENTROS que accedan a esta actividade deberán colaborar para fixar a data de realización e deberán contar cunha aula adecuada que dispoña de proxector.