12 Mai O Colexio Santiago Apóstol de Narón e o CRA Amencer de Ribadavia gañan a terceira edición do concurso ‘Pilabot’ de recollida de pilas

• O centro educativo de Ferrolterra estreouse como o mellor na categoría de quilos totais recollidos, con case 5 toneladas, mentres o colexio ourensán venceu por terceiro ano consecutivo en ratio de quilos por alumno, con 62,8 kg por estudante

• O CEIP As Solanas da Guarda, gañador en 2021, acadou esta vez a segunda posición en termos absolutos, e o CEIP de Caión (A Laracha) volveu ser segundo por alumno
• Tamén se fallou o concurso artístico #EuSonPilabot, con cinco alumnas gañadoras do CEIP As Solanas (A Guarda), o CEIP de Outes (Outes), o CPI O Toural (Vilaboa), o IES Carlos Casares (Vigo) e o IES Perdouro (Burela), que recibirán unha tablet
• Esta edición pecha novamente coa superación da barreira das 50 toneladas, grazas ao esforzo realizado polos 36.000 alumnos participantes, que se traduciu na recollida de 53.868 quilos de pilas, acumuladores e baterías usadas

O Colexio Santiago Apóstol de Narón e o CRA Amencer de Ribadavia convertéronse nos gañadores da terceira edición do concurso Pilabot. Este é o fallo do certame anual organizado pola Consellería de Medio Ambiente, Territorio e Vivenda en colaboración cos xestores de pilas autorizados na Comunidade galega —Ecopilas, ERP e Ecolec—.

Na terceira edición do concurso participaron durante 6 semanas uns 36.000 alumnos dun total de 150 centros de educación primaria e secundaria de toda Galicia. Este ano pechou coa recollida de 53.868 quilogramos pilas, acumuladores e baterías usadas, un dos residuos máis contaminantes que se xeran nos fogares, polo que por segundo ano consecutivo se superou a barreira das 50 toneladas.

Deste total, o CPR Santiago Apóstol de Narón levou o primeiro posto en termos absolutos, ao recoller case 5 toneladas de pilas na súas instalacións —en concreto, 4.749,70 kg—. Pola súa banda, gañador desta categoría o pasado ano, o CEIP Plurilingüe As Solanas-Nicolás Gutiérrez Campo da Guarda, foi segundo, grazas aos 3.287,85 kg recollidos.

O CEIP As Solanas Nicolás Gutiérrez Campo de A Guarda acadou o 2º premio na categoría de quilos recollidos por centro

Curiosamente, outro centro de Narón, o CEIP de Piñeiros, acabou terceiro, con 2.534,85 kg recollidos, mentres o cuarto posto foi para o CEIP da Cruz de Nigrán, con 2.421 kg.

O CRA Amencer de Ribadavia acadou de novo o 1º premio na categoría de quilos recollidos por alumno

O CEIP de Caión obtivo o 2º premio na categoría de quilos recollidos por alumno

Respecto da segunda categoría do concurso, que ten por obxectivo destacar o traballo dos centros coas mellores ratios de recollida por alumno, o gañador volveu ser por terceiro ano consecutivo o Centro Rural Agrupado (CRA) Amencer de Ribadavia, con 62,80 kg por estudante, e de novo o segundo premio foi para o CEIP de Caión, da Laracha, cunha media de 49,36 kg por alumno, 3 máis que na anterior edición.

Os catro centros recibirán un premio económico que deberán destinar á compra de material escolar ou deportivo. Concretamente, os primeiros premios de ambas categorías están dotados con 2.500 euros cada un, mentres que os centros que quedaron en segunda posición levarán como recompensa 1.250 euros.

Cinco rapazas premiadas no certame artístico

Obras gañadoras na 3ª edición do Concurso Artístico #EuSonPilabot